Liga e Kampioneve rikthehet të luhet ditën e sotme, me dy sfida të vlefshme për fazën e 1/16-ve të kompeticionit.
Chelsea pret në “Stamford Bridge”, Bayernin e Munihut në një sfidë anglo-gjermane. Ndeshja e fundit mes skuadrave në Ligën Kampioneve daton në vitin 2012, aty ku “Blutë” mundën gjermanët në finale me rezultatin 1-2 pas kohës shtesë.
Gjendja e skuadrave në kampionatet respektive është e ndryshme. Bayern Munih kryeson Bundesligën dhe po përjetojnë një formë mjaft pozitive ndërsa Chelsea me luhatje të shumta në rezultate renditen e katërta në Premier Ligë.
Për sa i përket mungesave, për vendasit do të mungojnë Ngolo Kante, Christian Pulisic dhe Van Ginkel të dëmtuar ndërsa për bavarezët nuk do të jenë të gatshëm Javi Martinez, Ivan Perisic dhe Niklas Sule.
Ndeshja tjetër do të jetë mes Napolit dhe Barcelonës. Kampionët e La Ligës, vijnë në këtë transfertë me moralin e lartë pasi kanë marrë kreun e renditjes nga Reali i Madridit por edhe për faktin që Lionel Messi është rikthyer në formën e jashtëzakonshme që e karakterizon.
Në kampin vendas, Napoli e vlerëson jashtëzakonisht këtë ndeshje, teksa të vetëdijshëm për skuadrën që do të kenë përballë do të përpiqen të jenë në maksimumin e formës së tyre.
Të dyja skuadrat vijnë në këtë përballje me mungesa të rëndësishme. Koulibaly, Fernando Llorente dhe Malcuit do të mungojnë për Napolin ndërsa në dyshim janë Elseid Hysaj dhe Milik. Për Barcelonën në sulm mungojnë Ousmane Dembele dhe Luis Suarez ndërsa i janë shtuar edhe dëmtimet e Sergio Robertos dhe Jordi Albas.
Ndeshjet luhen në orën 21:00.
