Real Madrid u ndal për herë të dytë radhazi në ndeshjet e La Ligës, teksa mbrëmjen e djeshme u mund 1-0 nga Levante.
Gjithashtu në atë ndeshje, ylli i skuadrës Edin Hazard pësoi një dëmtim që me gjasa do ta lërë belgun, jashtë fushave për një periudhë relativisht të gjatë. Për t’iu përgjigjur këtyre shqetësimeve trajneri i skuadrës, Zinedine Zidane ka dhënë një intervistë për mediat spanjolle.
Zinedin Zidan kërkon që ta mbajë ekipin të karikuar, por e di që dy ndeshjet e fundit nuk kanë qenë aspak pozitive. Ai thotë se në dy pasardhëset do të bëjnë gjithçka për të fituar, ndërsa dëmtimin e Edin Hazard e cilëson si shqetësues.
NDESHJA – “Në pjesën e parë ishim mirë, por në të dytën patëm probleme. Ata erdhën vetëm një herë në portën tonë dhe na shënuan gol. E dimë që mund ta ndryshojmë të gjithën këtë situatë. Jemi të zhgënjyer, sepse është një humbje që nuk na pëlqen, por futbolli na jep një tjetër mundësi për tri ditë”.
SHQETËSIM – “Nuk më shqetëson asgjë, sepse i tillë është futbolli. Kemi marrë dy rezultate negative në javët e fundit, por nuk është koha që të ngremë duart dhe të dorëzohemi. Duhet të vazhdojmë, sepse kemi forcë, shpirt dhe energji”.
EL CLASICO – “E dimë se çfarë ndeshjeje na pret dhe do të bëjmë gjithçka për ta fituar atë. Por më përpara kemi një ndeshje në Champions, e cila është gjithashtu e rëndësishme”.
HAZARD – “Nuk kam parandjenja pozitive. U dëmtua sërish në kaviljen ku vuante. Nuk e di, të shohim”.
ANALIZA – “Na mungoi goli, i cili është më i rëndësishmi në futboll. Kundërshtari erdhi në portën tonë vetëm një herë dhe shënoi. Në dy ndeshje kemi humbur 5 pikë dhe është koha që të përmirësohemi”.
