Përfaqësuesit e opozitës së Bashkuar zhvilluan një takim me reporteren e Parlamentit Europian për Shqipërinë, Isabel Santos. Në një prononcim për mediet pas përfundimit të takimit ish deputeti demokrat, Genc Pollo ripërsëriti edhe njëherë qëndrimin se zgjidhja e krizës vjen vetëm nëpërmjet zgjedhjeve të lira dhe të ndershme.
“Rruga e vetme për të rivendosure normalitetin kushtetues, demokratik në vend, janë zgjedhjet e lira dhe të ndershme dhe të parakohshme. Opozita po bën pjesën e saj për këtë restaurim dhe kthim në normalitet, që është kusht për BE. Është pengesa nga mazhoranca ajo që përbën një problem për Shqipërinë dhe negociatat. Ligjet si ai që i jep policisë që të përgjojë vend e pa vend. Me raporteren e PE-së, do të kemi një dialog të gjatë e të frytshëm”, theksoi Pollo.
Ndërkaq, ish deputetja e LSI-së Klajda Gjosha u shpreh se mazhoranca po përdor taktika për minimin e reformës zgjedhore, ndërsa shtoi se duhet të miratohet që nesër dhe opozita është në tryezë për ta bërë këtë të mundur.
“Më vjen shumë keq që për të minuar Reformën Zgjedhore mazhoranca përdor taktika të ndryshme duke sabotuar në të njëjtën kohë Reformën në Drejtësi, duke ulur kështu besimin tek Reforma në Drejtësi me manipulime nga më të ndryshme, të cilat i kemi parë gjatë ditëve të fundit dhe duke minuar në të gjitha mënyrat Gjykatën Kushtetuese që është dhe thelbi kushtetues i këtij vendi, por është dhe dera e vetme jo vetëm për politikanët, por mbi të gjitha për qytetarët shqiptar. Ndaj dhe në të gjitha mënyrat duhet gjendur zgjidhja për të hequr dorë më radhë të parë nga minimi i Reformës Zgjedhore dhe për mua data 15 mars është shumë vonë. Reforma Zgjedhore duhet të miratohet që nesër dhe opozita është në atë tryezë për ta bërë të mundur këtë“, tha Gjosha.
