Kreu demokrat Lulzim Basha ka reaguar lidhur me grevën e urisë së punonjësve të Poçemit.
Ndërsa shpreh mbështetje pa kushte për punëtorët dhe kërkesat e tyre, Basha thekson se ata janë tradhëtuar dhe keqtrajtuar nga qeveria.
“Viktimat e Edi Rames janë njerëzit e thjeshtë, qytetarët e ndershëm shqiptarë që luftojnë për mbijetesë dhe një jetë normale”, shkruan Basha në rrjetet sociale.
Në vijim ai thekson se “në këtë betejë Partia Demokratike do jetë zëri juaj, do jemi mbështetja juaj”.
“Beteja juaj është beteja e çdo shqiptari, ne do të na keni në krah deri në plotësimin e kërkesave tuaja të drejta. Ju jap fjalën se do ti zhbëj të gjitha padrejtësitë ndaj jush.
#PoTëDëgjoj”, përfundon mesazhin Basha.
Prej disa ditësh 14 punonjës ndodhen në grevë urie, ndërsa kërkojnë 27 pagat e parapambetura. Gjendja e tyre shëndetësore sa vjen e rëndohet, ndërsa ende nuk ka një reagim nga Qeveria apo deputetët e Rilindjes në Fier, mes të cilëve është edhe Kryeparlamentari Gramoz Ruçi.
Duke folur për mikrofonin e News 24, grevistët thanë se nuk ju duhet më jeta, pasi janë zhytur në borxhe, ndërsa i bënë thirrje kryeministrit Edi Rama dhe ambasadave të ndërhyjnë për të zgjidhur problemin e tyre.
Ata janë të vendosur për të vijuar kauzën e tyre, duke theksuar se marrja e 27 pagave të prapambetura është mundësia e vetme që i nxjerr nga greva.
Grevistët e Uzinës kanë refuzuar sot të marrin ndihmë mjekësore, edhe pse gjendja e tyre shëndetësore është përkeqësuar. Dy prej grevistëve janë zëvendësuar me kolegët, pasi janë ndjerë keq, për shkak edhe të rënies së temperaturave.
“Jemi mbytur në borxhe, e kemi shkruar emrin në të tëra dyqanet, nuk shkojmë dot në shtëpi. I lutemi kryeministrit të shohë ku ka hasur vështirësi që nuk po na paguajnë, nuk po na japin rrogat. Ne të vdekur jemi, për çfarë i duam mjekët të jetojmë më?”, tha një prej grevistëve.
