Operacioni Forca e Ligjit u ka dërguar formularët e vetëdeklarimit dy shtetasve në Berat, që kanë qenë të dënuar në Itali.
Zëdhënësja e OFL-së bëri të ditur se formularët e vetëdeklarimit u janë dërguar shtetasve Gazment Mahmutaj dhe Edison Çobo.
Sipas OFL-së Çobo dhe Mahmutaj kanë qenë dënuar në Itali për trafik droge.
“Në zbatim të detyrave të përcaktuara në Aktin Normativ të datës 31 janar 2020, vijon operacioni Forca e Ligjit, në bashkëpunim me strukturat vendore të Policisë, për dërgimin e kërkesave për vetëdeklarim të pasurisë.
Në këtë kuadër, OFL u ka dërguar kërkesat për vetëdeklarim të pasurisë shtetasve:
G. M., banues në Berat, i dënuar në Itali për “Trafikim të lëndëve narkotike”;
E. Ç., banues në Berat, i dënuar në Itali për “Trafikim të lëndëve narkotike”;
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së.
Më pas, përgjigjet e marra do t’i dërgohen SPAK-ut, për veprime të mëtejshme”, thuhet në deklaratën e OFL.
