Trafiku rraskapitës i Tiranës, vijon të paralizohet nga qarkullimi i mjeteve të tonazhit të rëndë në oraret e ndaluara.
Boldnews publikon këtë të shtunë pamjet që tregojnë se si mjetet e tonazhit të rëndë qarkullojnë pa problem dhe pa u shqetësuar nga policia, përgjegjëse për mbarëvajtjen e qarkullimit. Fotot janë shkrepur në Unazë dhe ashtu si një ditë më parë, mjetet i përkasin kompanisë “Alba Beton”. Vetëm se ndryshe nga dje, përveç betoniereve “Alba Beton” e ka zgjeruar gamën e automjeteve që qarkullojnë në rrugët kryesore të kryeqytetit në kundërshtim me Kodin Rrugor, duke rënduar, e në shumë raste dhe paralizuar trafikun.
Boldnews ka raportuar në mënyrë periodike për shkeljet e kësaj natyre, që sjellin shqetësim te drejtuesit dhe pasagjerët e mjeteve në Tiranë.
Nga vetë aksionet që njofton policia, nuk është bërë me dije ndëshkimi i asnjë prej këtyre rasteve.
Erjon Ahmeti, Shefi i Komisariatit të Policisë Rrugore Tiranë dhe Edmond Targaj, kreu i Policisë rrugore, deri më tani, kanë zgjedhur të bëjnë sehir se si ligji shkelet me të dyja këmbët nga kompanitë që kanë në përdorim këto mjete.
