Qarkullimi i betonierëve në rrugët kryesore të kryeqytetit në orare që e kanë të ndaluar, vijon të mbetet një shqetësim i pazgjidhur, pavarësisht se problematikës i është dhënë jehonë në media.
Pamjet që publikon “Boldnews” këtë të premte tregojnë një rast të tillë. Një betoniere që qarkullon në “Unazë”, e pashqetësuar nga policia për shkeljen e ligjit. Nga verifikimet, rezulton se mjeti i tonazhit të rëndë i përket firmës “Alba Beton”, ndërsa nuk dihet nëse e ka kaluar apo jo kolaudimin.
Sikur të mos mjaftonte trafiku i rënduar në kryeqytet, qarkullimi i betonierëve e rëndon edhe më shumë, apo e paralizon për minuta të zgjatura, duke shkaktuar vonesa e stres te drejtuesi dhe pasagjerët e mjeteve që qarkullojnë në rrugë.
“Boldnews” ka raportuar edhe më herët për problematikën, duke pasqyruar raste të ngjashme në mënyrë periodike. Një apel i është bërë edhe Erjon Ahmetit, Shefit të Komisariatit të Policisë Rrugore Tiranë, por nga vetë aksionet që njofton policia, nuk është njoftuar ndëshkimi i këtyre rasteve: Gjoba për parkim, alkool, përdorim celulari në timon… Për betonierët asnjë masë!
Nisur nga kjo situatë, “BoldNews” i bën thirrje kreut të Policisë rrugore Edmond Targaj: A ka informacion për këto mjete që qarkullojnë në oraret e ndaluara në rrugët kryesore të Tiranës?
/BN/
