Dy persona janë shpallur në kërkim nga policia e Shkodrës lidhur me konfliktin e djeshëm në “Parrucë”, ku u shënuan dhe të shtëna me armë zjarri.
Gledis Ustabeqiri, 26 vjeç, dhe Hygert Muçaj 24 vjeç, të dy banues në Shkodër, janë shpallur në kërkim. Ata akuzohen për veprat penale “Armëmbajtja pa leje”, “Prishja e rendit dhe e qetësisë publike” dhe “Plagosja e lehtë me dashje”.
Ngjarja
Sipas një rindërtimi paraprak të ngjarjes nga policia, sherri ndodhi rreth orës 13:50, në vendin e quajtur “Parrucë”, lagjja “Qemal Stafa”. Duke udhëtuar me mjetin tip “Benz ML”, dy personat në kërkim janë konfliktuar për motive të dobëta me shtetasin Taulant Ahmeti, 32 vjeç, banues në Shkodër. Hygert Muçaj e ka goditur Ahmetin me sende të forta në pjesën e kokës duke i shkaktuar dëmtime të lehta, ndërsa Ustabeqiri ka qëlluar me armë zjarri në ajër dhe më pas janë larguar.
Në vendin e ngjarjes u gjet dhe u sekuestrua në cilësinë e provës materiale një gëzhojë pistolete. Gjithashtu, pas kërkimeve intensive në lumin Buna, nga Njësia Polumbare e repartit RENEA u gjet dhe u sekuestrua pistoleta me të cilën u qëllua.
Burime policore thanë se Taulant Ahmeti është shoqëruar në polici, ka dëshmuar dhe më pas është lënë i lirë.
Ngjarja e regjistruar pason atë të pak ditëve më parë në pedonalen e qytetit, ku një 35-vjeçare kalimtare u plagos nga përplasja e dy grupeve me armë zjarri. /BN/
