63 vjeçarja Elketa Gjuzi e cila u përplas mesditën e sotme nga Ilda Bejleri në zonën e Myslym Shyrit, pranë urës së Drejtorisë së Policisë së Tiranës, ka folur nga spitali dhe ka thënë se është aksidentuar pikërisht nga moderatorja.
E moshuara është shprehur për Dritare.net se Ilda Bejleri e ka hedhur 2 metra larg me makinë, ndërsa arrogancë i ka thënë “Pse këtu kalohet” dhe është larguar menjëherë nga vendngjarja. Elketa Gjuzi ndodhet momentalisht në spitalin “Nënë Tereza” dhe siç ka pohuar vetë, ka thyer këmbën nga përplasja.
“Më hodhi dy metra tutje dhe nuk ndaloi. Ia bëra me dorë. Më pa dhe vazhdoi. Makinat ndaluan të gjitha, veç Ilda Bejlerit. Nuk e njoh po i thirrën në emër të gjithë dhe i kërkuan të qëndronte. Ajo u tha: “Pse këtu kalohet?” Pastaj ata më ndihmuan, më morën në makinë ata që i thirrën vajzës të ndalonte dhe më çuan në spital. Këtu jam akoma. Me këmbë të thyer. Të lutem mos ma thuaj emrin se e lexon mamaja ime. Është vetëm. Hallin e saj kam, jo timin. Na u prish shtëpia në Durrës nga tërmeti dhe erdhëm këtu derisa të gjejmë zgjidhje. Këtu ndodhi kjo që ndodhi. Më shtypën në mes të ditës, më hodhën si leckë dhe nuk ndaluan të më pyesin si jam. Vajza që më shtypi është Ilda Bejleri”, ka rrëfyer e plagosura.
Ndërkohë, vetë gazetarja theu heshtjen pas disa orësh në rrjetin social instagram, duke akuzuar disa portale për shpifje, por pa qartësuar nëse shpifën për përfshirjen e saj në aksident, apo për pasojat.
Më pas policia përmes një komunikate zyrtare, konfirmonte ngjarjen, duke thënë se gruaja ishte plagosur lehtë dhe ndodhej në spital, nën kujdesin e mjekëve dhe jashtë rrezkut për jetën. Policia gjithashtu thotë se është duke punuar për identifikimin dhe kapjen e makinës, pasi u largua nga vendi i ngjarjes, çka përbën shkelje më vete.
