Verona kërkon së paku 30 milionë euro për këdo skuadër që është e interesuar për shërbimet e Marash Kumbullës.
Lajmi është bërë i ditur sot nga “Gazetta dello Sport”, e cila thekson që klubi ka dalë hapur në kërkesat e saj duke parë interesin e jashtëzakonshëm të disa nga skuadrave më të mëdha në Europë.
Besohet se garën për qendërmbrojtësin shqiptar e kryeson Interi, por megjithatë asnjë ofertë zyrtare nuk është bërë deri më tani pavarësisht se mes palëve ka pasur takime gjatë merkatos së janarit.
Në Itali skuadër tjetër e interesuar për 20-vjeçarin është Juventusi, ndërsa admiruesit e tij shkojnë deri në Angli, me dy skuadrat e Manchesterit që vëzhgojnë situatën.
Kumbulla është një produkt i akademisë së Veronës dhe është nën kontratë me ta deri në përfundimin e sezonit 2021/22.
Këtë sezon ai ka bërë 18 paraqitje, ndërsa ka shënuar edhe një gol.
