Dy delegacione të Komisionit të Venecias do të mbërrijnë në Tiranë gjatë kësaj jave.
I pari do të ketë në fokus informimin për paketën anti-shpifje. Anti-shpifja u dërgua në Venecia nga Asambleja Parlamentare e Këshillit të Evropës.
I dyti do të mbledhë të dhëna mbi konfliktin e mazhorancës me presidentin për betimet në Gjykatën Kushtetuese.
Delegacioni që do të shqyrtojë ligjet e medias, do t’i nisë takimet të hënë me Kryetarin e Kuvendit Gramoz Ruçi dhe me të gjitha palët parlamentare, ndërsa të martën do të takojnë Presidentin Meta dhe institucionet e tjera.
Ndërsa sa i takon kërkesës së mazhorancës për shkarkimin e Metës, kjo është hera e dytë që Venecia mbërrin në Shqipëri.
Kjo pasi socialistët kërkuan një opinion edhe mbi betimet e gjyqtarëve Kushtetues, pas konfliktit me Presidentin që nuk e thirri për betim Arta Vorpsin.
Për këtë çështje, Venecias ju drejtua edhe Presidenti Meta me pyetjet e tij.
Të dërguarit e Komisionit do të takojnë palët të mërkurën dhe të enjten.
Për të dyja këto çështje, Komisioni i Venecias do ta japë opinionin e saj në mbledhjen e Asamblesë së saj në muajin mars.
