Ardhja e Emanuel Egbos në stolin e Tiranës, duket se ka ringjallur plotësisht klubin kryeqytetas të cilët para derbit me Partizanit në dhjetor të vitit të kaluar ishin në një moment tepër të vështirë.
Egbo ka arritur tetë fitore radhazi, 7-të nga të cilat kanë ardhur në kampionat ndërsa 1 në kupën e Shqipërisë.
Në intervistën pas suksesit me shkodranët në transfertë, Egbo u shpreh se e kishte përgatitur ndeshjen për të mos pësuar dhe për të pritur momentin e duhur për të shënuar golin e fitores.
“Është një ekip që tani ka krijuar një personalitet të tijin dhe një identitet e mentalitet fituesi, duke provuar triumfin deri në fund, pa u nxituar dhe pa u dorëzuar. Kur më pas ke lojtarë si Cale, Torrasa, Cobbinah, Ngo’o apo Batha, gjithçka mund të zgjidhet edhe më lehtë. Sot plani ynë ishte të mos pësonim, pasi ishim të bindur që goli do të vinte”.
