Detaje të reja bëhen me dije lidhur me organizatën shqiptare të trafikut të drogës, e goditur një ditë më parë, me 25 arrestime në 5 shtete europiane. “Boldnews” sjell të tjera detaje të përcjella nga mediat në Belgjikë, atje ku siç raportoi Europol, nisën dhe hetimet për organizatën që i kishte shtrirë tentakulat në shume vende të Europës.
Aksioni në Belgjikë
Sipas mediave belge, Një seri prej katërmbëdhjetë bastisjesh në banesa u kryen të enjten në mëngjes, në lokacione të ndryshme në Belgjikë, përfshirë Antwerp-in. Nëntë të dyshuar u arrestuan. I dyshuari, si drejtuesi i rrjetit u arrestua në lagjen Berchem, në Antwerp.
T dyshuarit akuzohen për rritje, transportim dhe shitje të drogës brenda dhe jashtë vendit. Në bashkëpunim me Europol dhe Eurojust, bastisje u kryen njëkohësisht në Francë, Spanjë, Holandë dhe Gjermani. Gjashtëmbëdhjetë të dyshuar u arrestuan në këto vende.
Hulumtimi filloi në vitin 2017 në Herentalsebaan Deurne të Antwerp -it. Policia kishte dyshime se në një apartament tregtohej kokainë. Vëzhgimet intensive dhe hetimi nga policia e Antwerp-it zbuluan përfshirjen e një bande në trafik. Dy plantacione droge u lokalizuan në Anderlecht dhe Ternat gjatë hetimit. Në sekuestrimin e fundit, në Assesteenëeg, Ternat, u gjetën rreth 1.250 bimë, më 9 prill 2019.
Hetimi zbuloi funksionimin e një rrjeti shqiptarësh.
Banda transportonte dhe tregtonte drogë në të gjithë Evropën Për këtë qëllim automjetet u përshtatën, në mënyrë që paratë dhe droga të transportoheshin në hapësira të fshehura. Disa të dyshuar si pjesë e rrjetit, ishin të njohur për përfshirjen në trafik droge dhe ishin dënuar në disa vende.
Kokainë nga Amerika e Jugut
Organizata drejtohej nga Antwerp, por aktivitetet e saj kriminale u zhvilluan kryesisht në pjesën tjetër të Evropës, në veçanti në Gjermani, Francë dhe Spanjë. Prandaj, me ndihmën e Europol, u krijua kontakt me autoritet ligjzbatuese në këto shtete.
“Gjatë përgjimeve, hetuesit morën informacion në lidhje me importin e mundshëm të një sasie kokaine nga Amerika e Jugut, por asnjë kokainë nuk u kap në këtë fazë të hetimit,” tha Kristof Aerts, nga zyra e prokurorit të Antwerp në një deklaratë për shtyp.
Të enjten në mëngjes, u bënë kërkime në katërmbëdhjetë banesa në Antwerp, Bruksel dhe Charleroi. Nëntë të dyshuar u arrestuan: pesë shqiptarë dhe katër belgë. I dyshuari kryesor u arrestua nga policia e Antwerp në Berchem. Raportohet se është gjetur dhe sekuestruar një armë zjarri dhe afërsisht 55,000 euro.
Aksioni jashtë Belgjikës
16 arrestime u kryen jashtë Belgjikës, në katër vende. Gjatë kontrolleve, u gjet një armë, rreth 30,000 euro dhe gjashtë kilogram kanabis. Shtatë plantacione u sekuestruan, me gjithsej rreth 2.500 bimë.
Gjykatësi paraprak do të vendosë brenda 48 orëve nëse nëntë të dyshuarit e arrestuar në Belgjikë do të lihen në burg. Kristof Aerts tha se akuzat që rëndojnë ndaj të arrestuarve janë ato për posedim, kultivim e trafik droge dhe pjesëmarrje në organizatë kriminale, si dhe armëmbajtje pa leje.
“Do të kërkohet ekstradim për një numër të dyshyarish të ndaluar jashtë vendit”, deklaron ai.
/BoldNews/
