Cristiano Ronaldo e nisi karrierën e tij me Sporting Lisbonën, atje ku emri i tij shpërtheu. Në vitin 2003 kaloi te Manchester United ku luajti për 6 sezone duke u bërë dhe futbollisti më i mirë i botës. Pasi fitoi gjithçka në Angli, ishte koha që të nënshkruante me klubin e fëmijërisë së tij, Realin e Madridit. Me “Los Blancos”, CR7 thelloi legjendën e tij në botën e futbollit duke u bërë një ikonë e vërtetë.
Ndërsa nga vera e vitit 2018, portugezi luan në Seria A me skuadrën e Juventusit ku edhe pse tashmë si 35 vjeç vazhdon të jetë në majën e futbollit botëror.
Duke folur për “Canal 11”, Cristiano Ronaldo ka deklaruar që karriera e tij ka arritur në një pikë që ai nuk e priste, si dhe deklaroi se fitimi i Ligës së Kampioneve me Juventusin është i mundshëm.
“Në moshën 35-vjeçare mendoja se do të isha një peshkatar në Madeira. Klubet me të cilat kam luajtur dhe sukseset që kam pasur as nuk më shkonin ndër mend në kohën kur luaja për Sportingun”.
Ndërsa i pyetur për një tjetër trofe të Ligës së Kampioneve, portugezi është përgjigjur: “Liga e Kampioneve? Është e mundur. Të luash për Juventusin të jep mundësinë për të fituar Ligën e Kampioneve. Është shumë e vështirë por kemi një skuadër të mirë dhe mund ta arrijmë objektivin hap pas hapi”.
