Ambasadorja e amerikane në Tiranë, Yuri Kim, do të zhvillojë rreth orës 15.00 një takim me kreun e opozitës, Lulzim Basha. Takimi raportohet se do të zhvillohet në selinë e PD. Yuri Kim ka zhvilluar takime me aktorët kryesorë të politikës në vend.
Pritet që në takimin me kreun e PD-së të diskutohet mbi situatën politike në vend, reformën në drejtësi, atë zgjedhore, por edhe mbi disa prej nismave të Qeverisë, si ajo anti-KÇK, për të cilën opozita ka shprehur rezerva.
Pasi i dorëzoi letrat kredenciale Presidentit Ilir Meta, Yuri Kim është takuar me Kryeministrin Edi Rama dhe disa prej ministrave, anëtarët e institucioneve të reja të drejtësisë, Prokurorin e Përgjithshëm, si dhe ka organizuar një pritje me përfaqësues të institucioneve, mediave, shoqërisë civile etj.
Kim ka bërë publikisht të njohura prioritetet e saj, që kanë të bëjnë me shtetin ligjor, me demokracinë, rritjen e fuqisë së Shqipërisë si partner strategjik, dhe nxitjen e biznesit dhe shkëmbimit në këtë drejtim mes dy vendeve.
Ambasadorja amerikane ka deklaruar se do të angazhohet për zgjidhjen e krizës politike në vend. Ajo u shpreh se me vullnet dhe sakrificë, 2020 mund të sjellë transformime mahnitëse në Shqipëri.
