Deputeti Lefter Maliqi i ftuar në ‘Top talk’, ka komentuar situatën aktuale politike si dhe depozitimin e kërkesës së tij për interpelancë me ministren e Drejtësisë, Etilda Gjoni.
Gjatë intervistës Maliqi theksoi se interpelanca me ministren Gjoni ka të bëjë me shkarkimet masive që janë kryer me urdhër të saj, ndaj drejtuesve të lartë të drejtorive të burgjeve në vendin tonë.
Ndërsa shtoi se ai do të kërkojë interpelanca javët e ardhshme dhe me ministrin e Brendshëm Sandër Lleashaj për situatën e rëndë kriminale që po kalon vendi. Gjithashtu Maliqi tha se ka kërkuar interpelancë edhe me kryeministrin e vendit Edi Rama, por kjo kërkesë nuk është pranuar nga kryetari i Kuvendit, Gramoz Ruçi.
“Aktualisht unë jam pa një mbështetje politike dhe i vetëm “trim në luftë”. Unë nuk kam asgjë personale me askënd. Unë sot depozitova dhe kërkesën tjetër për interpelancë të ministrit të brendshëm për kriminalitetin e rëndë në Shqipëri. Pra çdo gjë unë e nis me atë që shoh në sytë e publikut. Pas ministres së drejtësisë javën tjetër do të jetë do të jetë dhe Z. Lleshaj. Madje unë vitin e kaluar kam kërkuar një interpelancë me kryeministrin Rama, ku kaloi një muaj dy muaj tre muaj Z.Ruçi e lexoi dhe nuk pranoi të ishte në interpelancë, që e ka me rregull”, u shpreh deputeti.
Pikërisht në këtë pikë të bisedës së tyre ndërhyri gazetari Denis Dyrnjaja i cili e pyeti deputetin “Nëse ndiheni i papërfillur nga kryeministri në këtë rast?”
“Nuk ndihem i papërfillur, mbase kryeministri nuk dëshiron përballje. Mbase mendon që diçka në atë përballjen midis nesh do të dali në dritë në sytë e të gjithë shqiptarëve. Do të ketë përballje me kryeministrin Rama dhe të jeni të bindur që në parlament do të dali”, u përgjigj Lefter Maliqi.
