Partia Socialiste ka mbledhur asamblenë në Bashkinë e Gramshit dhe ka zgjedhur kryetarin e ri, Enis Zani. Në këtë asamble, mori pjesë edhe kryetari i grupit parlamentar të Partisë Socialiste, Taulant Balla, si dhe deputeti i PS Anastas Angjeli.
Emri i Enis Zanit, 28 vjeç, është denoncuar në vitin 2017 për një konflikt të ndodhur në qytetin e Gramshit.
Admirim Kala, asokohe kandidat për deputet në Qarkun e Elbasanit nën siglën e LSI-së, shprehej se Enis Zani së bashku të rinjtë e FRESSH-it kanë bezdisur frekuentuesit e lokalit të familjes së tij dhe për këtë stafi i ka kërkuar që të largohen. Sipas Kalës, jo vetëm që Zani nuk është larguar por është konfliktuar me punonjësit e lokalit dhe familjarët e tij.
Denoncimi
Në një postim në FB, në 19 Qershor, një ditë pas ngjarjes, Admirim Kala, mes të tjerash, shprehej:
“Një natë më parë, në lokalin që administroj unë dhe familja ime kanë mbërritur disa të rinj të FRESSH me në krye shtetasin Enis Zani për të shpërndarë fletushkat e fushatës së tyre… Por të afërmit e mi më njoftuan se dje rreth pasdites Enis Zani së bashku të rinjtë e FRESSH-it kanë bezdisur frekuentuesit e lokalit dhe për këtë stafi i ka kërkuar që të largohen. Por ata jo vetëm nuk janë larguar nga ambientet private, por janë konfliktuar me stafin dhe familjarët e mi që ndodheshin aty… ‘Trimat’ e FRESSH-it me në krye Klodi Tacen, kryetarin e PS-së së Gramshit nuk janë mjaftuar duke provokuar frekuentuesit e lokalit dhe mbështetësit e LSI-së. Nipi i tij, Eno Sadik Tace, banues në Tiranë, i cili javët e fundit është vendosur në Gramsh, është përplasur fizikisht edhe me mua. Pasi kam folur në telefon me kryetarin e PS-së së Gramshit për të sqaruar situatën, nipi i tij së bashku me persona të tjerë të dyshuar me preçedentë penal më janë afruar dhe më kanë goditur…”
