Shkon në 5 numri i të arrestuarve në lidhje me pengmarrjen, me pasojë vdekjen e Jan Prengës.
“Sektori për Krimet e Rënda në Drejtorinë Vendore të Policisë Tiranë, nën drejtimin e Prokurorisë pranë Gjykatës së Shkallës së Parë Tiranë, në vijim të veprimeve të kryera për zbardhjen dhe dokumentimin e plotë të ngjarjes mbi rrëmbimin e shtetasit Jan Prenga, të ndodhur në rrugën ‘London’, Kamzë, në bashkëpunim me Komisariatin e Policisë Kavajë, ka bërë ndalimin e shtetasit Festim Bexhidi, 30 vjeç, banues në Kavajë”, bëri me dije policia.
Nga tërësia e veprimeve hetimore, dyshohet se ky shtetas, në bashkëpunim me 4 shtetasit e ndaluar më parë dhe me shtetas të tjerë, e kanë rrëmbyer për ta mbajtur peng, shtetasin Jan Prenga, më datë 17 Janar, në Kamzë.
“Në cilësinë e provës materiale shtetasit Festim Bexhidi, i janë sekuestruar dy telefona dhe një sasi prej 850 eurosh. Për shkak të rëndësisë së hetimit, nuk bëhen të ditura detaje të tjera. Sektori për Krimet e Rënda në DVP Tiranë, në bashkëpunim me Prokurorinë vijon punën për dokumentimin e plotë të kësaj ngjarjeje dhe gjetjen e trupit të shtetasit Jan Prenga Materialet do i kalohen për ndjekje të mëtejshme Prokurorisë pranë Gjykatës së Shkallës Parë Tiranë, për veprat penale ‘Rrëmbimi ose mbajtja peng e personit’, ‘Fshehja ose asgjësimi i kufomës’, ‘Veprime që pengojnë zbardhjen e të vërtetës’, ‘Përkrahja e autorit të krimit’, të kryera në bashkëpunim dhe ‘Armëmbajtja pa leje’”, njoftoi policia.
Dyshohet se rrëmbimi ka ardhur si pasojë e një konflikti që një nga vëllezërit e viktimës ka pasur me organizatoret dhe rrëmbyesit, si pasojë e disa konflikteve për çështje droge në Britaninë e Madhe. /BN/
