Arlind Ajeti pritet të jetë gati për debutimin zyrtar me Torinon. Ditët e fundit, mbrojtësi kuqezi kishte pësuar një lëndim, që vuri seriozisht në dyshim prezencën e tij në San Siro, për ndeshjen e parë të këtij sezoni në Serinë A kundër Milanit.
Por, lajmet që vijnë nga infermieria e Torinos janë pozitive. Sipas stafit mjekësor të “granatave” rreziku ka kaluar dhe 22-vjeçari do të jetë normalisht në dispozicion të trajnerit Mihajlovic.
Ajeti i është bashkuar skuadrës në stërvitje, duke punuar gjatë gjithë kohës me pjesën tjetër të grupit të lojtarëve dhe kjo ka bërë që periudha e rikuperimit të cilësohet e përfunduar.
Mbrojtësi i Kombëtares kishte pësuar një goditje në pulpë gjatë miqësores me Hull City, duke bërë që ish-lojtari i Frosinones të ngadalësonte integrimin në skuadër dhe të humbiste ndeshjen në Kupën e Italisë.
Por, tashmë duket se gjithçka është hedhur pas shpine dhe kuqeziu mund të rifillojë të përshkojë kilometra në stërvitje, për të qenë një lojtar kyç në revolucionin e Torinos në repartin difensiv.
Gjendja fizike e Arlind Ajetit do të vlerësohet deri në çastet e fundit, megjithatë me paraqitjet e shkëlqyera në testet miqësore përpara startit të sezonit, mbrojtësi i qendrës është një prej kandidatëve të fort për një vend titullari kundër Milanit.
