Mbi 100 hektarë pyje janë shkrumbuar nga flakët në Akërni të Vlorës. Zjarri që u raportua fillimisht rreth mesditës të së shtunës vazhdon të jetë i ndezur në disa zona të izoluara, por pa rrezikshmëri përhapje.
Dhjetëra forca zjarrfikëseje, punonjësit e Bashkisë, forcat e ushtrisë si dhe ndërhyrja me helikopter gjatë mbrëmjes së djeshme bënë të mundur lokalizimin e flakëve, por rreziku është ende evident. Në disa momente ka qenë në rrezik edhe jeta e zjarrfikësve, pasi zjarri ka marrë përmasa shumë të mëdha, ndërsa është favorizuar edhe nga era që frynte duke e përhapur akoma më shumë.
Fatmirësisht nga zjarri nuk u shënuan të lënduar por vazhdimisht policia u bëri thirrje banorëve dhe pushuesve që të largoheshin nga zona.
Përhapja e flakëve në një kohë të shkurtër u ndihmua edhe nga era e fortë, çka vështirësoi edhe punën për shuarjen e tij. Pak pas mesnate në vendin ku ra zjarri ishte edhe kryebashkiaku i Vlorës, Dritan Leli, i cili deklaroi se ka qenë një zjarr i qëllimshëm.
