Takimi i tretë i të ashtuquajturit mini-Shengenit Ballkanik, është programuar që të mbahen në vendin tonë në datat 20 dhe 21 dhjetor. Tre liderët ballkanikë, kryeministri shqiptar Edi Rama, ai maqedonas Zoran Zaev dhe presidenti serb Aleksandër Vuçiç pas takimeve më herët në Novi Sad dhe Ohër, tani do të mblidhen në Tiranë.
Por siç duket, kjo nismë e Vuçiçit dhe Ramës nuk po shkon ashtu siç ata pretendonin. Kosova ishte shteti i parë që e refuzoi këtë samit.
Presidenti Hashim Thaçi me anë të një letre deklaronte se refuzoi ftesën pasi Serbia ka bërë genocid kundër qytetarëve të Republikës së Kosovës dhe sot jo vetëm që mohon krimet e kryera, por vazhdon të mos e pranojë ekzistencën e shtetit të Kosovës.
Por, sipas medias serbe Danas, edhe presidenti malazez Milo Gjukanoviç dhe përfaqësuesit nga Bosnja dhe Hercegovina nuk e kanë konfirmuar pjesëmarrjen e tyre në këtë samit.
Përsa i përket pjesëmarrjes së Bosnje Hercegovinës në samit, një zyrtar në Sarajevë për gazetën serbe ‘Danas’ ka treguar se ende nuk ka informacion nëse dikush do të marrë pjesë.
