Kreu demokrat, Lulzim Basha, u shpreh sot gjatë një takimi me anëtarët e grupit parlamentar, për një plan me 3 pika të opozitës për zgjidhjen e krizës politike në vend.
Basha tha se zgjedhjet e parakohshme të lira dhe të ndershme, angazhimi konkret i forumeve për të shpalosur alternativën, si dhe gadishmëria për çdo vendim, nëse Edi Rama bllokon reformën konsensuale zgjedhore, janë 3 pikat e planit të opozitës.
“Edi Rama zgjati gjendjen e jashtëzakonshme që të fshehë krizën e thellë ekonomike ku është futur vendi. Viti tjetër do të jetë një vit edhe më i vështirë. S’ka rritje pagash, pensionesh, nuk ka lehtësira për biznesin që po falimenton çdo ditë.
Edi Ramës i duhet gjendja e jashtëzakonshme, pasi po përgatit afera të tjera korruptive mbi rrënojat e korrupsionit. Kërkesa ime është të rrini pranë qytetarëve, të ngrini zërin për padrejtësitë ndaj tyre,” tha Basha.
Sipas tij, opozita do prezantojë pas festave propozimet për reformën zgjedhore.
“Edi Rama po zvarrit miratimin e reformës zgjedhore, sepse nuk do që të bëjë zgjedhje të lira dhe të ndershme. Zgjedhjet janë kusht për nisjen e negociatave të Shqipërisë me BE.
Pas festave, do të prezantojne para qytetareve propozimet tona për reformen zgjedhore dhe kërkojmë që brenda muajit janar të miratohet reforma dhe t’i hapet rrugë zgjedhjeve vendore dhe të përgjithshme sa më shpejt”, u shpreh Basha.
