Nga Boldnews.al
Detaje të reja dalin në dritë nga vrasja e dyfishtë në Patos, ku humbën jetën dy gardianë të burgut të Fierit. 22-vjeçari Martin Skëndaj, gardian në burgun e Fierit, është arrestuar nga policia si autor i vrasjes së dy kolegëve. Situata agravoi në përdorimin e armës nga Skëndaj, pas një konflikti çasti me Manol Rrapajn dhe Elis Kapajn në poliklinikën e Patosit. Një prej tyre ndërroi jetë në vend menjëherë pas sulmit, ndërsa tjetri ndërroi jetë në spital pasi nuk mundi ti mbijetojë plagëve të marra.
Shkaku? Duket se një histori rozë përfundoi në të zezë…
***
Manol Rrapaj, dyshohet se ishte i dashuri i motrës së Martin Skëndajt (autor i vrasjes). Ky i fundit duket se nuk e ka pranuar një fakt të tillë dhe ka qëlluar me armë duke i marrë jetën Manol Rrapajt bashkë me shokun Elis Kapajn.
Sipas raportimeve, tri ditë më parë, Manol Rrapaj kishte kallëzuar penalisht në Policinë e Fierit autorin Martin Skëndaj dhe babanë e tij, pasi këta të fundit kishin shkuar për të debatuar me të, dhe pretendonin se ai kishte ngacmuar motrën e 22-vjeçarit, identiteti i të cilës ende nuk bëhet me dije për mediat.
Sipas denoncimit të bërë në polici, Rrapaj kishte thënë se në momentin kur ata kishin shkuar për t’u sqaruar, kishin patur me vete edhe mjete prerëse. Pas denoncimit, materialet i kishin kaluar Prokurorisë së Fierit për kanosje.
***
Disa banorë të lagjes ku jetonin viktimat dhe autori i vrasjes, janë shprehur se djemtë njiheshin të mirë nga të dyja palët.
“Të mirë ishin të dy, çuna të urtë, familje të mira. Konfliktet s’i dimë ne, i di prokuroria, por ka pas ca gjëra të vogla.”-shprehet një prej banorëve.
“Sot e mora vesh lajmin. I njihnim si djem të mirë, edhe ky që qëlloi edhe ata tjerët, se çfarë kanë pasur nuk e di. Nuk e di për konflikt, s’di gjë çfarë kanë pasur me njëri-tjetrin. Janë afër, ngjitur me njëri-tjetrin. Pastaj se ka qenë e çastit, se ka qenë e vjetër, nuk e di”-u shpreh një tjetër banor.
Ndërsa një banor tjetër shprehet se familjet kanë qenë shumë të mira, por kjo që ndodhi nuk duhet të ndodhte. “Nuk di asgjë për konflikt mes tyre, vetë si person nuk kam dëgjuar gjë. Shumë të mirë ishin të dy, edhe viktima, edhe ish-polici i burgut. Unë isha në punë, kur erdha në shtëpi e pashë në televizor.”- u shpreh një tjetër banor.
