Pavarësisht zërave kundër që sa vijnë e shtohen, kryeministri Edi Rama nuk tërhiqet nga paketa e paguar “anti-shpifje”, i cilësuar një ligj që synon të kapë mediat dhe të censurojë lirinë e shprehjes.
Në fjalën e tij nga foltorja e Kuvendit, Rama mbrojti paketën e qeverisë, që sot kalon për votim në parlament. Ai madje, ofendoi kritikët: “Jemi përballë një turme që nuk lexon dhe as nuk denjon të lexojë. Që thotë, ne nuk e lexojmë ligjin se s’duam ligj”.
“Ky ligj do të miratohet sot, si një e drejtë e gjithkujt që të mbrohet nga llumi i shpifjes. Dhe ne do të vijojmë për aspektet rregullatore”, shtoi kreu i qeverisë.
Ndërkohë, gazetarët dhe shoqëria civile po zhvillojnë një protestë për të kundërshtuar paketën ligjore.
Gazetarët, organizata të medias vendase e të huaja, institucione vendase dhe ndërkombëtare, kanë shprehur kritika ndaj ligjit. Reagimi i fundit ndërkombëtar ishte nga David Lega, reporter i Parlamentit Europian për Shqipërinë nga grupi parlamentar PPE. Ai ka deklaruar se Shqipëria rrezikon seriozisht të mos hapë negociatat nëse parlamenti kalon ligjin censurë për mediat të qeverisë Rama.
“Nëse administrata Rama miraton legjislacionin e medias në formën aktuale në seancën, ajo do të rrezikojë seriozisht shanset për hapjen e negociatave për anëtarësim në BE. Ata duhet të jenë në përputhje me rekomandimet e lëshuara nga Komisioni Evropian dhe Këshilli i Evropës”, shkroi në një postim në Twitter suedezi i Partisë Kristiandemokrate.
