Aktorja Charlize Theron ishte vetëm 15 vjeçe kur babai i saj i alkoolizuar qëlloi me armë derën e dhomës ku ishte fshehur ajo dhe mamaja e saj. Ajo është shprehur se nuk i vjen turp të flasë për momentin kur nëna e saj i qëlloi për vdekjen të atin për vetëmbrojtje.
“Asnjë nga plumbat nuk na qëlloi, ishte mrekulli. Por për vetëmbrojtje, mamaja i dha fund këtij kërcënimi,”- tha ajo për NPR.
Charlize u rrit në një fermë në Johannesburg në Afrikën e Jugut me nënën e saj Gerda dhe babin Charles. Ajo e përshkroi të atin si një njeri të sëmurë dhe tha se jetesa me një alkoolist është situatë mjaft e pashpresë.
Duke folur për atë që ndodhi natën e vrasjes, aktorja tha se babai i saj ishte shumë i dehur kur hyri në shtëpi me armë.
“Nëna ime dhe unë ishim në dhomën e gjumit duke u mbështetur te dera, sepse ai po përpiqej ta shtynte për tu futur brenda,”- tha ajo. “Ai bëri një hap mbrapa dhe qëlloi 3 herë në derë. Asnjë nga plumbat nuk na goditi. Por për vetëmbrojtje mami i dha fund kërcënimit.”
Charlize tha se dhuna që përjetoi brenda familjes së saj është diçka të cilën e ndan me shumë njerëz.
“Unë nuk kam turp të flas për këtë sepse mendoj se sa më shumë flasim për këto gjëra, aq më shumë kuptojmë që nuk jemi vetëm në asnjë prej tyre,”– shtoi aktorja.
