Gazetari Ylli Dylgjeri ka ironizuar në rrjetet sociale paketën anti-shpifje, për të cilën Kryeministri Edi Rama shpreh vendosmërinë për miratimin në seancën e rradhës plenare në Kuvend, pavarësisht kritikave dhe kundërshtive brenda dhe jashtë vendit.
Dylgjeri bën një krahasim mes radiolojës së bërë nga Sigurimi i Shtetit në kohën e diktaturës dhe asaj që e quan portalo-loja në qeverisjen Rama.
“Nga Radioloja te Portaloloja
Dikur në diktaturë, Sigurimi i Shtetit rekrutoi agjentë të huaj dhe bëri Radiolojën.
Sot në demokraci, Administrata e Shtetit rekrutoi italianin Carlo Bollino dhe po bën Portalolojën…”, shkruan Dylgjeri.
Karlo Bolino është një nga pronarët e mediave që ka mbështetur hapur Kryeministrin Edi Rama, madje edhe në inisiativën e tij për atë që njihet si paketa anti-shpifje.
Dhe suporti qeveritar ndaj një prej pronarëve të medias, në rastin konkret Bolinos nuk ka munguar.
Kështu, pak muaj më parë Edi Rama i ka dhënë botuesit Karlo Bolinoprona me qira me 1 euro për 20 vjet.
Në Fletoren Zyrtare është publikuar dhe ka hyrë në fuqi vendimi i Këshillit të Ministrave datë 2 tetor 2019, për “Dhënien e miratimit për lidhjen e kontratës së qirasë me tarifën 1 euro/kontrata, ndërmjet Ministrisë së Financave dhe Ekonomisë, si qiradhënës, dhe shoqërisë “MTSC” sh.p.k., si qiramarrës, për pasurinë shtetërore “Ish-ndërmarrje metalike ‘Tirana’” (Reparti i orëve), prona nr. 19, me numër pasurie 7/649, me sipërfaqe të përgjithshme 4021.50 m², nga të cilat sipërfaqe ndërtimore 1624.44 m 2, dhe sipërfaqe funksionale 2397.06 m2, zona kadastrale 8220, në përgjegjësi administrimi të Ndërmarrjes Industriale nr. 1, Tiranë, për një periudhë 20 (njëzet) vjet, sipas genplanit dhe tekstit të projektkontratës që i bashkëlidhen dhe janë pjesë përbërëse të këtij vendimi”.
Nga të dhënat e Qendrës Kombëtare të Biznesit, rezulton se kompania “MTSC” është pronë e Bolinos.
