Që nga aksidenti që pësoi në Alpet Franceze më 29 dhjetor të vitit 2013, gjendja shëndetësore e Michael Schumacher ka qenë enigmë me shumë pak informacione.
Përderisa familja e tij ka qëndruar e heshtur, mjeku i tij e ka thyer këtë heshtje dhe e ka zbuluar gjendjen shëndetësore të ish-kampionit të Formula 1.
Sipas tij Michael Schumacher është ende duke marrë terapi, që pritet të zgjasë deri në tre vjet.
“Ai ka një plan një deri në trevjeçar për shërim, për periudhën e rigjenerimit”, ka thënë Jean-Francois Payen, mjeku që e konfirmoi i pari vitin e kaluar se legjenda e Formula 1 nuk ishte më në komë.
“Unë ende e vizitoj atë dhe flas për familjen për çfarëdo progresi që shoh”.
Megjithatë, Payen shtoi se Schumacheri është në gjendje pozitive dhe po shkon drejt shërimit. Ai gjithashtu tha se bashkëshortja e Schumacherit, Corinna, është duke e bërë maksimumin për t’i ndihmuar bashkëshortit të saj të shërohet sa më shpejt, duke ia krijuar kushtet optimale për shërim.
“Ajo menjëherë e dinte sa serioze ishte situata dhe e dinte rrugën e gjatë që e kishim para vetes. Ajo i sheh gjërat shumë qartësisht dhe është e gatshme të bëjë gjithçka për ta përmirësuar gjendjen e bashkëshortit të saj”- foli ai për “Eurosport”.
