Arkeologu Neritan Ceka ka thënë në emisionin “360 gradë”, se Durrësi është një zonë sizmike, ku ka tërmet shkatërrimtare, por jo katastrofike.
Ceka ka thënë ndër të tjera se tërmetet bëhen shkatërrimtare për shkak të pakujdesisë njerëzore.
Më tej ai u shpreh se edhe vetë ka zgjedhur të qëndrojë në banesë, si në tërmetin e 21 shtatorit ashtu edhe atë të 26 nëntorit.
“Po të pyesni arkeologët do të thonë: Po Durrësi është një zonë sizmike, tërmetet janë periodikë, janë shkatërrimtarë, por jo katastrofikë. Këtë e them edhe për të qetësuar shqiptarët që thonë do rrimë apo nuk do rrimë në Shqipëri. Vërtet do ta rindërtojmë atë pjesë që u prish, por kush i mbush mendjen shqiptarëve që nuk na bie një tërmet më shkatërrimtar se ky. Unë si arkeolog në jetën time kur ndodhi ky i shtatorit kam shkuar ja kam fut gjumit. Pse, sepse jam i sigurt që këtu tërmet katastrofik nuk ka. Edhe për tërmetin e fundit kam fjet në shtëpi. Ajo që i them gjithë shqiptarëve është që tërmete shkatërrimtare ka kur ne nuk jemi të kujdesshëm, por tërmete katastrofik nuk ka”, ka thënë Ceka.
