Ndahet nga jeta në moshën 66-vjeçare prokurori pranë gjykatës së shkallës së Parë në Tiranë, Apostol Prifti. Lajmi është konfirmuar nga familjarët e prokurorit Prifti, të cilët kanë dhënë edhe detaje lidhur me ceremoninë e lamtumirës.
Më 25 prill të këtij viti Këshilli i Lartë i Prokurorisë miratoi mbarimin e statusit të prokurorit për Priftin për efekt të mbushjes së moshës për pension pleqërie.
“Bazuar në nenin 149/a të Kushtetutës së Republikës së Shqipërisë; nenin 64, pika 1, shkronja c) të Ligjit Nr. 96/2016 “Për statusin e gjyqtarëve dhe prokurorëve në Republikën e Shqipërisë”; nenin 92 të Ligjit Nr. 7703 datë 11.05.1993 “Për sigurimet shoqërore” i ndryshuar me Ligjin Nr. 104, datë 31.07.2014;
Këshilli i Lartë i Prokurorisë, pasi u njoh me të dhënat personale, nga Sektori i Burimeve Njerëzore për Prokurorin Apostol Prifti votoi në unanimitet, projekt-vendimin për mbarimin e statusit të prokurorit për z. Apostol Prifti për efekt të mbushjes së moshës për pension pleqërie”, thuhej në vendimin e KLP-së.
Ndërkohë përmes një postimi në rrjet, gazetari Edmond Prifti, nipi i prokurorit, ka bërë një mesazh prekës.
“E kishim lënë të takoheshim me të mrekulleshmin xhaxha këtë fundjavë, pas kohësh mes problemeve e punëve të mia në terren. “Eh mor nipce s’me gjen gjë mua. Jam kockë e fortë”, kur i thoja dobësohu pakëz z. Prokuror, se një goditje e ka dhënë zemra dikur, ndërsa shiheshim rastësisht, teksa ecte në piedonale me qenushin e shtëpisë.
Ajo zemër ishte tejet e madhe. Jo veçse një xhaxha i mrekullueshëm, por një nga prokurorët më me zë të Shqipërisë…Sikur na mblodhi për herë të fundit gjithë fisin me rastin e daljes në pension, pak muaj më parë… Veçse 65 vjeç. Do më mungojë zëri i tij, gjithçka… Do na mungosh i dashur xhaxhai ynë, Apostol Prifti”, shkruan gazetari në rrjet.
