Ngjarja e rëndë në Xhyrë të Librazhdit, ku një çift të sapo martuarish dyshohet se janë vetëhelmuar me fostoksinë, ka ngritur mjaft hipoteza dhe pista hetimi për policinë. Burime nga Grupi hetimor bëjnë me dije se nga ekspertiza mjeko-ligjore u konstatua se çifti kishte pirë fostoksinë, ndërkohë deri më tani nuk dihen rrethanat e qarta ngjarjes fatale.
Por i vetmi që mund të hedhë dritë mbi ngjarjen në fjalë është Olsiani, i cili ndodhet në spitalin e Elbasanit në gjendje kritike. Ndonëse se ngjarja është e mbuluar me mister, çifti në faqen e tyre në rrjetet sociale shfaqeshin shumë të afërt me njëri-tjetrin, ku bënin dedikimet e dashurie. Kjo gjë është vërejtur dhe nga miqtë dhe komentuesit në profilin e tyre në ‘Facebook’, të cilët shfaqen skeptikë për faktin se çifti mund të ketë helmuar veten.
Disa prej tyre shprehen se dikush mund t’i ketë shtyrë që të ndërmarrin këtë akt, apo dhe mund t’i ketë helmuar. Ndërkohë, familjarët e çiftit pohojnë se mes tyre nuk kishte asnjë konflikt dhe se ata kishin marrëdhënie shumë të mirë.
Olsi dhe Rezarta Hajdari u helmuan në shtëpinë e tyre në fshatin Xhyrë të Librazhdit. 19-vjeçarja që vetëm pesë ditë më parë kishte veshur fustanin e bardhë, u gjet pa shenja jete, ndërsa 27-vjeçari ndodhet në gjendje të rëndë në spitalin e Elbasanit.
Fillimisht u raportua si vetëhelmim, ndërsa pista tjetër ku kanë nisur hetimet është se mund t’i ketë helmuar dikush me fotoksinë.
