Kryeministri Edi Rama ka vendosur të rikthejë në qeveri ish-ministrin e Financave dhe Ekonomisë, Arben Ahmetajn.
Rama ka propozuar që Ahmetaj të jetë ministër i Shtetit për Rindërtimin.
Propozimi i është dërguar Presidentit, Ilir Meta, për t’a dekretuar.
Ahmetaj ishte një ndër ministrat që me ndryshimet e qeverisë në fillim të vitit u largua nga kabineti, por iu besua drejtimi i Komisionit Parlamentar për Ekonominë dhe Financat.
Tashmë, pas tërmetit të 26 nëntorit, Rama i ka besuar postin e ministrit për Rindërtimin, Arben Ahmetajt.
“Programi i Rindërtimit dikton hapjen e një vendi të posaçëm edhe në tryezën e Këshillit të Ministrave,ku një ministër i ngarkuar ekskluzivisht me koordinimin e të gjitha institucioneve vendase e ndërkombëtare që lidhen me këtë program,të ndjekë orë e minutë zbatimin e Programit”, ka postuar Rama në rrjetet sociale.
