Ardian Dvorani, kryetari i KED, është paraqitur mëngjesin e sotëm para Prokurorisë së Tiranës, pas kallëzimit të Presidentit Ilir Meta ndaj tij.
Dvorani pritet të japë dëshminë e tij para prokurorit Alket Mersini, ndërsa një ditë më parë në prokurori shkoi Kreu i Shtetit, me cilësinë e personit që ka bërë kallëzimin.
Pasi edhe Dvorani të japë dëshminë e tij, do të jetë organi i akuzës që do të vendosë se çfarë do të bëhet me kallëzimin penal ndaj kreut të KED-së.
Një ditë më parë, Presidenti i ka bërë thirrje prokurorisë që të kryejë hetimet, pasi ka prova të mjaftueshme për dy akuzat e ngritura nga Meta ndaj Dvoranit: ajo e shpërdorimit të detyrës dhe përvetësimit të titujve dhe detyrave shtetërore.
“Jam këtu në përgjigje të ftesës nga institucioni i Prokurorisë, pas kallëzimit penal që kam bërë për shtetasin Ardian Dvoranin, për vepra të qarta penale, atë të shpërdorimit të detyrës dhe përvetësimit të kompetencave. Besoj se kemi dhënë sqarime të mëtejshme dhe plotësuese.
Në vijim të të gjitha provave, dokumenteve që kemi dorëzuar së bashku me kallëzimin penal, unë shpresoj që Prokuroria të mos jetë nën presione politike, por të bëjë punën e saj me profesionalizëm.
Presidenti ka zbatuar në mënyrë të drejtpërdrejtë dispozitat kushtetuese. Të gjitha provat e depozituaara deri tani janë të mjaftueshme që prokuroria të veprojë ndaj shtetasit Ardian Dvorani.
Ne nuk bëjmë presione, pavarësisht se çështja është mjaft e rëndë, sepse ka vënë në pikëpyetje shtetin e së drejtës në Shqipëri”, tha një ditë më parë Meta.
