Policia Rrugore e Tiranës ka vënë në pranga 21 drejtues mjetesh dhe motomjetesh, nga të cilët 12 në gjendje të dehur, 8 të papajisur me leje drejtimi, si dhe 1 për falsifikim të dokumenteve zyrtare.
Këto arrestime janë bërë pas kontrolleve parandaluese gjatë javës që kaloi për evidentimin dhe procedimin e shkeljeve që janë burim për aksidente rrugore.
Përveç arrestimeve, janë pezulluar 89 leje drejtimi, nga të cilat 43 për drejtim mjeti nën efektin e alkoolit dhe janë vendosur 45 gjoba.
Nuk kanë munguar as 176 procedime për përdorim të celularit gjatë drejtimit të mjetit; 134 për mospërdorimin e kaskës mbrojtëse dhe 14 raste kur drejtues mjetesh, shfrytëzonin mjetet e përdorimit vetjak për transport pasagjerësh.
Policia, duke konsideruar faktin dhe rëndësinë që ka siguria e jetës së nxënësve, apeloi për më shumë kujdes nga të gjithë përdoruesit e rrugës, kryesisht pranë shkollave, ku rreziku për t’u përfshirë në ngjarje rrugore është akoma më i madh.
