Nga Boldnews.al
Gjyqtarja e Krimeve të Rënda, Liljana Baku, ka dhënë dorëheqjen pak para se të përballej me procesin e Vetingut.
Baku ka dorëzuar dorëheqjen në Këshillin e Lartë Gjyqësor në 2 Dhjetor 2019. Në kërkesë, gjyqtarja Baku ka deklaruar se do të angazhohet në biznes privat.
Baku, një gjyqtare me karrierë të gjatë, dha një vendim kontrovers në Tetor të vitit të kaluar. Ajo shqyrtoi kërkesat e Prokurorisë për Krime të Rënda për caktimin e masave të sigurimit për denoncuesit e Agron (Geron) Xhafaj.
Gjyqtarja Baku vendosi masën e sigurisë “arrest me burg” për Albert Veliun, personin që denoncoi publikisht vijimin e aktivitetit të paligjshëm të trafikut të narkotikëve nga vëllai i ministrit të Brendshëm të asaj kohe, Fatmir Xhafaj.
Gjithashtu, gjyqtarja Baku vendosi masë sigurimi ‘detyrim për paraqitje” për ish-deputetin demokrat, Ervin Salianji dhe gazetarin Jetmir Olldashi. Të tre dyshoheshin për “kallëzim të rremë” në dëm të Agron (Geron) Xhafaj.
Gjyqtarja Baku ligjëroi një seri veprimesh kontradiktore dhe “të sajuara” të prokurorit të çështjes, Gentian Osmani, i shkarkuar pak kohë më parë nga Kolegji i Posaçëm i Apelimit, pasi nuk i dilnin llogaritë financiare gjatë procesit të Vetingut.
Gjithashtu, gjyqtarja Baku, ligjëroi edhe një seri mos-veprimesh të kryera nga Prokuroria për Krime të Rënda ndaj Agron (Geron) Xhafaj.
Pasi “i shërbeu” më së miri Fatmir Xhafajt, tashmë Liljana Baku dha dorëheqjen “për t’u angazhuar në biznes privat”, një zgjidhje personale që krijon dyshime shumë të forta, sidomos pak para se ajo të përballej me Komisionin e Pavarur të Kualifikimit.
Liljana Baku është zyrtarja e radhës e drejtësisë që, pas shërbimit të ofruar ndaj Fatmir Xhafajt, e sheh veten jashtë sistemit gjyqësor.
Para saj janë shkarkuar prokurorët që ndoqën hetimin për “denoncuesit” e Agron (Geron) Xhafaj, e konkretisht Gentian Osmani dhe Përparim Kulluri.
Po ashtu, nga Vetingu është shkarkuar edhe prokurori i Apelit të Krimeve të Rënda, Artan Bajrami, i cili mbështeti kërkesat “absurde” të kolegëve të tij të shkallës së parë për “penalizimin” e denoncuesve të Agron (Geron) Xhafaj.
