Rreth 15 mln lekë të vjetra si dhe një automjet janë grabitur nga një banesë në Lezhë nga persona të maskuar.
Burime zyrtare nga policia e Lezhës, bëjnë me dije se më datë 09.08.2016, rreth orës 01:20 është njoftuar se është vjedhur banesa e shtetasit Z.B., banues në Ishull Shëngjin. Menjëherë në vendngjarje ka mbërritur grupi hetimor që kanë konstatuar se 3 persona të maskuar, me anë të dhunës kanë vjedhur shumën monetare prej 1.500.000 lekë të reja si dhe një mjet “Golf 5” në pronësi të shtetasit Z.B.
Falë veprimeve të shpejta hetimore ky mjet është lokalizuar dhe po ndiqej nga policia, por autorët e dyshuar të gjendur nën presionin e ndjekjes, kanë braktisur mjetin, i cili është gjetur i rrëzuar në një kanal anës rruge dhe autorët e dyshuar janë larguar duke përfituar nga errësira.
Janë shoqëruar disa persona si dhe janë sekuestruar disa sende në cilësinë e provave materiale.
Punohet për identifikimin e kapjen e autorëve për veprën penale “Vjedhja me dhunë, kryer në bashkëpunim”.
Kjo është vjedhja e katërt brenda 24 orëve e ndodhur në vend. Dje u grabit banka BKT në mes të Tiranës, një pikë e tregtimit të gazit në Fushë-Prezë si dhe një pikë e Wester Union në Fushë-Krujë.
