Një person është arrestuar pasi akuzohet se ka vjedhur 20 mln lekë të vjetra në banesën e kushëririt në Kamëz. Në lidhje me ngjarjen, janë proceduar penalisht edhe dy adoleshentë, mes tyre një vajzë.
Vjedhja ndodhi më datë 06 nëntor 2019, ku në banesën e shtetasit Xh.Q. u morën 2 milionë lekë të reja.
Shërbimet e Komisariatit të Policisë Nr.5, finalizuan me metoda proaktive operacionin policor të koduar “Cousins” në kuadër të të cilit u arrestua A. Q., 25 vjeç, banues në Kamëz, kushëri i pronarit të banesës së vjedhur, shtetasit Xh.Q.
Gjithashtu, u proceduan në gjendje të lirë shtetasit: G. Q., 15 vjeç, dhe A. Q., 14 vjeçe, banuese në Kamëz.
Nga tërësia e veprimeve hetimore dhe procedurale të kryera ka rezultuar se në datë 11 nëntor 2016, këta tre shtetas, në bashkëpunim me njëri-tjetrin, kanë vjedhur banesën e shtetasit Xh.Q., ku kanë marrë 2 milionë lekë të reja, bënë me dije burime zyrtare nga policia.
Materialet iu referuan Prokurorisë së Rrethit Gjyqësor Tiranë për veprën penale “Vjedhje e kryer në bashkëpunim”, shtuan të njëjtat burime.
