Gazmend Oketa, ish-zv.kryeministër në qeverinë Berisha, e cilësoi si të nxituar veprimin për shembjen e objekteve në Durrës.
Oketa tha se nëse këto ndërtesa nuk përbënin rrezik për ndërtesat ngjitur me to, atëherë vëmendja duhej të përqëndrohej në një tjetër drejtim, lidhur me situatën.
Gjithashtu Oketa tha se këto ndërtesa mund të shërbenin si prova në hetimin e prokurorisë, por edhe të studimit nga inxhinierë apo arkitektë.
“Nga tërmetet ndodhin dëmtime, dhe në vende të ndryshme të botës ka praktika kur inxhinierë apo arkitektë të ndryshëm mblidhen dhe studiojnë mbi rastin, shkaqet që kanë ndodhur dëmtimet”, tha Oketa, i cili në profesion është inxhinier.
Ai tha se në të paktën një rast, kur edhe ai vetë ka konstatuar se kati i parë i një pallati ishte jashtë funksionit dhe familjarët duhej të largoheshin, pronarit të banesës nuk iu dha asnjë copë letër, por iu tha shko në komunë dhe apliko.
“Mendoj se në raste të tilla shteti duhet të funksionojë jo me aplikacione, por me shkresa.
Tërmeti i 21 shtatorit dha disa pasoja, kemi tërmetin e Korccës, dhe tërmeti i 26 nëntorit ishte shumë i fortë dhe goditi zemrën ekonomike të vendit, Tiranën dhe Durrësin”, tha Oketa.
