Deklaratat e fundit të kryeministrit Edi Rama, pas tërmetit të fuqishëm të 26 nëntorit, i cili i cilëson mediat si kriminale, cilësohen si të padrejta nga gazetarët.
Në një intervistë për Ora News, gazetari Gjergj Erebara shprehet se për shkak të pazotësisë për të menaxhuar situatën pas tërmetit, kryeministri po përpiqet të gjejë një armik imagjinar.
“Për sa i përket synimit të Edi Ramës për të krijuar armiqësi mes qytetarëve dhe gazetarë, ajo që kam vënë re në Durrës ishte pikërisht e kundërta. Qytetarët shohin me më shumë shpresë nga media sesa nga kryeministri”, shprehet Erebara.
Ndërsa, tentativat për të mbyllur një sërë mediash online, Erebara i sheh si cënim të lirisë së medias.
“Nga ana praktike është një banalitet në përputhje të plotë me cilësinë e qeverisjes së vendit sepse në botën e internetit Shqipëria ka shumë pak kapacitete për censuruar median”, thekson gazetari
Lidhur shoqërimin e gazetarëve nga Policia e Shtetit, Erebera deklaron se, kjo e fundit duhet të ndiqet penalisht.
“Në kushtet e një vendi normal demokratik do të duhet të hetoj nga Prokuroria si abuzim me detyrën. Policia e Shtetit po pushon së qeni Policia e Shtetit dhe po bëhet policia private e Edi Ramës”, thotë Gjergj Erebara.
Vazhdimisht, kreu i qeverisë ka sulmuar mediat në situata të pazakonta, për të cilat Erebara shprehet shërbejnë për ta mbajtur vendin larg standardeve të kërkuara nga Bashkimi Europian.
