Ish-deputeti i Partisë Demokratike, Luçiano Boçi iu kundërpërgjigj deputetit të Partisë Socialiste, Sadri Abazi, i cili u akuzua më herët se kishte hequr dy kate të hotelit të tij në Durrës për të fshehur gjurmët e shkatërrimeve nga tërmeti.
Boçi thotë se deputeti, angazhoi gjithçka për të mbuluar gjurmët e krimit ndërtimor dhe lejes abuzive të ish-kryebashkiakut, Vangjush Dakod për të shpëtuar milionat e tij.
Ish-deputeti demokrat thotë gjithashtu se dy hotelet e Abazit, kanë kate shtesë pa leje.
Abazi në reagimin e tij tha se akuzat që i bëhen nga opozita janë të pavërteta dhe se në hotelin e tij nuk ka asnjë dëmtim dhe ndërhyrje në kate pasi është funksional.
Ai tregoi më tej se hoteli ka pasur vetëm disa plasje të vogla në mure. Ndërsa sa i përket takimit me Luçiano Boçin, për të cilin ky i fundit tha se kishte pasur replika, Sadri Abazi deklaroi se vetëm ka qeshur dhe e ka takuar përzemërsisht dhe se ai i kishte thënë ‘ju nëmi Zoti ju socialistët’.
“Janë të pavërteta. Tërmeti në Durrës ishte shkatërrues. Gjej rastin të ngushëlloj të afërmit që humbën fëmijët. Nuk është pallat, por hotel. Hoteli është funksional dhe nuk kishte si të kishte 2 kate tepër dhe t’ia hiqja unë. Nuk është hequr asnjë kat jo dy kate. Hoteli ka pësuar vetëm plasje të vogla të mureve, asgjë tjetër. Nuk është klasifikuar i pabanueshëm. Është në gjendje pune dhe në këto momente”, tha Abazi.
Reagimi i plotë i Boçit:
Është e vërtetë që zoti Abazi ishte shumë, po shumë i qeshur sot! Ngazëllehej me fatin tragjik të njerëzve dhe nuk ndjente aspak shqetësim për gjendjen e tyre dhe prishjen e provave. Ai ishte aty për “bahçen” e vet.
Në vend që të angazhonte njerëz e mjete për t’i ardhur në ndihmë banorëve që kanë humbur jetë, djersë e mund, kishte angazhuar gjithçka për të mbuluar gjurmët e krimit ndërtimor dhe lejes abuzive të Gjushit e për të shpëtuar milionat e veta.
Një turp i pa rrëfyer ky, i bërë në mes të ditës, duke i bërë karshillëk hapur njerëzve që nuk dinë ku të fusin kokën.
Ndërkohë qytetarët denoncojnë tanimë hapur, që hotelet AS dhe HORIZONT të tij janë me kate shtesë abuzive.
Normal është i përkëdheluri i Ramës si shumë SADRINJË të tjerë.
Sa për replikën, qartazi qytetarisht ia vura në dukje atë që po bënte.
Për citimin që ka sjellë ka mashtruar publikisht.
Fjala “nëmi” është e zonës së Sadriut. Janë krejt fjalët e tij.
Këtej nga ne përdoret “mallkoi” e nuk ia vlen të zgjatem këtu pasi nuk pjesë e fjalorit tim. Unë s’jam Rama as Sadriu.
Por zakoni del me shpirtin dhe Sadriu, nën shembullin e Ramës, si sadrinjtë e tjerë, vetëm mashtrojnë, abuzojnë, fshehin krime e bëjnë miliona me thasë nën rrënojat e një Shqipërie që e grabisin e vjedhin dhe e rrjepin duke qeshur, tallur e bërë show-n e neveritshëm.
Por për sërën e llojin e Ramës, Gjushit e kompani ka një ndëshkim.
Ndëshkim që do vijë nga vota e lirë e socialistëve të nëpërkëmbur e të mashtruar, nga vota e demokratëve të përndjekur këtu e gjashtë vite, nga vota e qytetarëve të cilëve u ka ardhur Rama, Sadriu, Gjushi e banda e Rilindjes, në majë të hundës.
