Nga Boldnews.al
Parlamenti i Shqipërisë pritet të ketë një axhendë të ngarkuar në seancën e parë plenare pas tërmetit tragjik, në të cilën mbetën të vdekur 51 persona, u plagosën disa qindra të tjerë dhe u dëmtuam mijëra apartamente e banesa.
Parlamenti pritet të votojë Aktet Normative me fuqinë e ligjit, të ndërmarra nga Këshilli i Ministrave pas tërmetit të 26 Nëntorit. Por, ndër të tjera, deputetët janë thirrur për të votuar edhe “projekt-vendimin për zgjedhjen e Prokurorit të Përgjithshëm”.
Në rendin e ditës të datës 5 Dhjetor 2019, Parlamenti pritet të shqyrtojë 4 Akte Normative të Qeverisë, të cilat lidhen me plotësimin e nevojave për të dëmtuarit nga tërmeti, si edhe për dëmshpërblimet financiare të personave që, fakteqësisht, humbën jetën pas lëkundjeve sizmike të datës 26 Nëntor 2019.
Ndërkohë, krahas diskutimet të akteve e projekt-ligjeve që lidhen me tërmetin, Parlamenti pritet të vendosë edhe për emrin e Prokurorit të Përgjithshëm me mandat të plotë.
Në pikën 15 të rendit të ditës, kryetari i Kuvendit, Gramoz Ruçi, ka nënshkruar “Projekt-vendim ‘Për zgjedhjen e Prokurorit të Përgjithshëm’”.
Rregullorja e Kuvendit, në nenin 111 të saj, parashikon se, me paraqitjen e kandidaturave, Kryetari i Kuvendit ia përcjellë ato Komisionit përkatës (të Ligjeve), i cili vendos nëse kandidaturat plotësojnë kriteret ligjore. Komisioni i Ligjeve organizon edhe seanca dëgjimore për secilin kandidat.
Për zgjedhjen e Prokurorit të Përgjithshëm është e paqartë nëse Komisioni i Ligjeve do të organizojë seanca dëgjimore. Por, me shumë mundësi, përsa kohë që është përfshirë në rend dite të seancës plenare “Projekt-vendimi për zgjedhjen e Prokurorit të Përgjithshëm”, emri i drejtuesit të ri të institucionit të Akuzës pritet të zgjidhet që në seancën e datës 5 Dhjetor.
Këshilli i Lartë i Prokurorisë (KLP) i ka dërguar Kuvendit më 22 Nëntor 2019 listën me tre emrat e kandidatëve që garojnë për drejtuesin e Prokurorisë së Përgjithshme në 7 vitet e ardhshme.
Pas një procesi vlerësimi, KLP renditi në krye të listës prokurorin e Krimeve të Rënda, Olsian Çela. Pas tij renditen Prokurorja e Përgjithshme e Përkohshme, Arta Marku dhe prokurorja e Apelit të Tiranës, Fatjona Memçaj.
Kushtetuta parashikon që Prokurori i Përgjithshëm zgjidhet një prej tre kandidaturave që votohet me një shumicë të cilësuar prej të paktën 84 deputetësh.
Në rast se, brenda 30 ditëve nga depozitimi i listës në Kuvend, asnjëri prej kandidatëve nuk arrin të sigurojë numrin 84, atëherë lista i rikthehet sërish Këshillit të Lartë të Prokurorisë, i cili emëron Prokuror të Përgjithshëm kandidatin e renditur të parin në listë.
Ndërkohë, Parlamenti duket se nuk e ka “harruar” përplasjen me Presidentin e Republikës, Ilir Meta, në vijim të procesit të përzgjedhjes së anëtarëve të Gjykatës Kushtetuese.
Në rendin e ditës së seancës plenare të 5 Dhjetorit, deputetët pritet të votojnë edhe projekt-vendimin për: “Një shtesë në objektin e veprimtarisë së Komisionit Hetimor për kontrollin e ligjshmërisë së veprimeve të kryera nga Presidenti i Republikës…”.
