Manchester United ka fituar Superkupën e Anglisë për herën e 21-të, pasi ka mundur me rezultatin 2-1 kampionët e Anglisë, Leicester. Asnjë klub tjetër anglez nuk e ka fiuar këtë kompeticuion më shumë se United. Heroi i takimit ka qenë Zlatan Ibrahimovic, i cili ka realizuar golin e fitores shtatë minuta para fundit, pas një asisti të marrë nga Valencia.
Kështu, Jose Mourinho e ka nisur me trofe aventurën e tij si trajneri i “Djajve të Kuq”, ndërsa suedezi vazhdon të bëjë atë që ka bërë gjithmonë, të shënojë gola dhe të jetë vendimtar. Por nuk ka qenë një fitore aspak e lehtë për United. Ekipi i portugezit ka zhbllokuar takimin me Jese Lingard, i cili ka realizuar në paraqitjen e tij të fundit në “Wembley” kur i ka dhuruar “Djajve” fitoren në Kupën e Anglisë.
Mesfushori ka depërtuar mbrojtjen e “Dhelprave”, para se të dërgonte topin në rrjetë. Kampionët e Anglisë kanë reaguar në pjesën e dytë, duke shënuar me Jamie Vardy, i cili ka përfituar nga një pasim i gabuar i Fellaini-t mbrapa. Sulmuesi i Leicester është gjendur i vetëm përballë De Gea-s dhe ka shënuar pasi ka shmangur portierin spanjoll. Ka qenë Zlatan ai që ka vendosur takimin shtatë minuta para fundit me një goditje me kokë, duke i dhuruar United trofeun e parë të sezonit.
Liecester-Manchester United 1-2
Shënues: Vardy 52’/Lingard 32’, Ibrahimovic 83’
Leicester: Schmeichel, Simpson (Hernandez 62’), Huth (Ulloa 89’), Morgan, Fuchs (Schlupp 80’), Mahrez, Drinkwater, King (Mendy 62’), Albrighton (Gray 46’), Okazaki (Musa 46’), Vardy. Trajner: Ranieri.
Manchester United: De Gea, Valencia, Bailly, Blind, Shaw, Carrick (Herrera 61’), Fellaini, Lingard (Mata 63’ – Mkhitaryan 93’), Rooney (Schneiderlin 87’), Martial (Rashford 70’), Ibrahimovic. Trajner: Mourinho.
Gjyqtar: Pawson
Kartonë të verdhë: Simpson, King, Vardy/Bailly
