Tedi Blushi, Zëdhënësi i Presidentit Ilir Meta, u paraqit sot te Prokuroria e Tiranës ku është pyetur lidhur me akuzat e tij dhe të kreut të shtetit, se është shantazhuar nga një përfaqësues ambasade në Tiranë.
Në një prononcim për mediat, Blushi tha se ishin dy persona të cilët i kanë kërkuar të fshijë një postim në rrjetet sociale.
“Prokuroria është njohur me të gjitha faktet. Shantazhi ka qenë për shkak të detyrës. Ishin dy telefonues. Kam besim te drejtësia. Sot njoha prokurorinë me faktet”, u shpreh Blushi.
Ai tha se të dy personat nuk kanë lidhje me njëri-tjetrin, duke sqaruar se njëri prej tyre fliste në gjuhë të huaj, por pa specifikuar se çfarë gjuhe.
“Me njërin fola në shqip, ndërsa me tjetrin në gjuhë të huaj”, tha Blushi, duke shtuar se për momentin nuk do të jepte më shumë detaje.
Ishte presidenti Ilir Meta ai i cili u shpreh se zëdhënësi i tij ishte shantazhuar në emër të një ambasade të huaj. Sipas tij shantazhi kishte ardhur vetëm 30 minuta pas statusit të bërë nga Blushi në përgjigje të Ambasadës Amerikane duke i quajtur ndërkombëtarët grup të strukturuar diplomatik.
