Eksperti i ekonomisë, Pano Soko, i ftuar në SYRI TV, u ndal te mënyra se si janë shpenzuar taksat që janë mbledhur nga Bashkia e Tiranës. Kjo e fundit ka rritur ndjeshëm taksat në kryeqytet, po Soko thotë se përfitimet nga kjo rritje nuk duken. Sipas tij, janë 150 milionë dollarë të projektuara për investime, që nuk dihet se si janë shpenzuar.
Ai u ndal veçanërisht tek taksa për arsimin që paguhet në Tiranë që kur Erion Veliaj mori detyrën e kryebashkiakut. Soko thotë se janë mbledhur 25 milionë euro, por nuk dihet se ku kanë shkuar pasi është ndërtuar vetëm një shkollë, kur mund të ndërtoheshin mbi 20.
“Për taksën e arsimit ne paguajmë 8 mln euro vetëm sivjet. Bashkia nuk ka në plan të shpenzojë fare për të ndërtuar shkolla, por do i japë me PPP. Pra te një kompani private, e cila pasi ta mbarojë shkollën, ne do vazhdojmë t’i paguajmë lekët. 1 milionë euro shkon kostoja për një shkollë, me modelin e Bashkisë do të kushtojë 4 milionë euro. Biznesi fiton edhe nga ndërtimi i shkollës, por edhe 3 milionë euro. Mungesa e transparencës është kryesore,” tha ai.
Më pas ai foli edhe për çmimet e ujit në Tiranë.
“Ujësjellësi i Tiranës deklaronte 5 milionë dollarë fitime në vit. Tani fiton 11-12 milionë dollarë në vit. Ne pra kishim një kompani me fitim. U justifikua rritja e çmimit të ujit me nevojën për të marrë një kredi. Po tani që Ujësjellësi fiton 12 milionë dollarë, ku është kredia, ku është uji? Ka dy vjet që paguajmë ujin e shtrenjtë. Çfarë kemi marrë mbrapsht ne?
Ka dhënë leje ndërtimi në qendër të Tiranës. Është bërë Tirana si Kabul në këtë drejtim. Do të sjellë krizë në furnizimin me ujë. Pse kemi ardhë në krizë për furnizimin me ujë? Prandaj, pavarësisht se e kemi rritur çimin, shohim më pak ujë në çezma,” tha Soko.
