Gjykata e Lartë, me një trupë provizore të caktuar nga KLGJ-së për rastet e urgjencës, ka vendosur që të prishë vendimin e Apelit të Gjykatës së Durrësit për Alket Hatinë duke e rikthyer sërish në këtë institucion për ta rishqyrtuar. Gjykata e Lartë vendosi rigjykimin e kësaj dosje me argumentin se “Gjykimi dhe vendimi ishte me mangësi të theksuara”. Por Alket Hatia është i lirë prej 11 korrikut të 2017 pas vendimit të Gjykatës së Shkallës së Parë.
Gjykata e Durrësit rrëzoi kërkesën për ekstradimin e Alket Hatisë në Itali në datë 5 mars të vitit 2018. Sipas gjykatës së Durrësit, Hatia e ka kryer dënimin 16 vite në Shqipëri për të njëjtat vepra penale që akuzohet në Itali. Vendimi është marrë nga gjyqtari Paulin Çera. Alket Hatija 45 vjeç është etiketuar nga mediat italiane si “Zot i drogës”.
Ai u arrestua me 8 korrik me urdhër të Prokurorisë së rrethit Durrës pasi emri i tij u shfaq në sistemin e personave të shpallur në kërkim ndërkombëtar nga Interpol Roma. Urdhri i kërkimit ndërkombëtar bazohej në vendimin e datës 30 shtator 2016 të Gjykatës së Milanos, që e dënonte Hatinë me 20 vjet burg për trafik narkotikësh. Hatija ka vuajtur një dënim në Shqipëri dhe pretendon se e ka shlyer dënimin për të njëjtat fakte penale që është gjykuar edhe në Itali.
Në kërkesën për gjykim të ekstradimit të Alket Hatisë, prokuroria e Durrësit konstatonte se bëhet fjalë për 15 episode të trafikut të drogës. Episode këto që sipas vetë prokurorisë së qytetit bregdetar ishin të njëjta me ato episode që Hatia është dënuar dhe në Itali.
Ndër të tjera prokuroria e Durrësit shtonte asokohe se dy vendimet penale të marra ndaj këtij shtetasi bëjnë fjalë për episode të një fakti penal të ndodhur vërtetë në Shqipëri dhe Itali në formën e trafikimit të lëndëve narkotike. Alket Hatija ishte i etiketuar si “Zoti i drogës” nga mediat italiane si “Zot i drogës”. Hatija ka vuajtur një dënim në Shqipëri në vitet 2008-2014 për “trafik narkotikësh” pretendon se e ka shlyer dënimin për të njëjtat fakte penale që është gjykuar së fundmi edhe në Itali.
