Prokuroria e Krimeve të Rënda i ka dërguar një shkresë Dhomës Kombëtare të Noterisë, lidhur me arratisjen e ish-kryebashkiakut të Vorës, Agim Kajmakut. Në atë shkresë janë urdhëruar të gjithë noterët në vend të njoftojnë, nëse Kajmaku paraqitet pranë tyre.
“Noterët të njoftojnë policinë, nëse para tyre paraqitet Agim Kajmaku. Nëse nuk njoftojnë, noteri do të mbajë përgjegjësi ligjore”, thuhet në shkresën e Prokurorisë.
Shkresa iu është shpërndarë të gjitha zyrave të noterisë në vend dhe mban firmën e drejtuesit të seksionit, Kolë Hysenaj.
Kajmaku u shkarkua nga KQZ pasi shkeli ligjin e dekriminalizimit, në këtë formë kërkon lirinë, edhe pse nuk është përballur ende me drejtësinë për të dhënë shpjegime.
Kajmaku akuzohet për veprat penale “Shpërdorim detyre”, “Falsifikimi i formularëve”, “Ushtrimi i funksioneve pas dhënies fund të detyrës”, pasi pas vendimit të KQZ, ai ka shkarkuar nga detyra dy nënkryetarët e bashkisë, megjithëse edhe vetë ishte zyrtarisht i shkarkuar si titullar i Bashkisë Vorë.
Policia e Tiranës vijon ende kërkimet për gjetjen e ish-zyrtarit socialist, me qëllim ekzekutimin e masës së sigurisë, por deri tani nuk është rënë në gjurmët e tij. Gjykata kishte urdhëruar edhe kontrollin e banesës së Kajmakut për të gjetur prova që vërtetojnë shpërdorimin e detyrës.
Fillimisht Kajmaku, u akuzua nga Partia Demokratike se ishte arrestuar në Greqi, nën emrin Jorgo Toto, për veprën penale të falsifikimit të parave, por që nuk e kishte paraqitur në formularin e dekriminalizimit. Akuzat e PD u konfirmuan edhe nga Prokuroria e Përgjithshme, e cila, pasi bëri verifikimin e shenjave të gishtërinjve të Kajmakut dhe shenjat e gishtërinjve të shtetasit Jorgo Toto, të arrestuar në Greqi, rezultoi se ishte i njëjti person.
