Presidenti Iir Meta ka firmosur sot dekretin per lirimin nga detyra të ambasadorit shqiptar rezident në Turqi, Genti Gazheli dhe emërimit në këtë post të Kastriot Robos.
Shkarkimi dhe dekretimi është bërë me propozim të kryeministrit Edi Rama.
“Z. Kastriot Robo, emërohet ambasador i Jashtëzakonshëm dhe Fuqiplotë i Republikës së Shqipërisë në Republikën e Turqisë, rezident, si dhe ambasador i Jashtëzakonshëm dhe Fuqiplotë i Republikës së Shqipërisë në Republikën e Azerbajxhanit, në Republikën Islamike të Iranit, në Republikën e Kirgistanit, në Republikën Islamike të Pakistanit, në Republikën e Gjeorgjisë, në Republikën Islamike të Afganistanit dhe në Republikën e Kazakistanit, jorezident”, thuhet në dekretin e Metës.
Ambasadori i ri
Kastriot Robo ishte në Komisionin e Politikës së Jashtme për një seancë dëgjimore javën e kaluar. Përpara anëtarëve të komisionit, diplomati i karrierës shpalosi prioritetet e tij në krye të diplomacisë shqiptare në Turqi, ku u ndal te diplomacia ekonomike dhe ajo publike.
E pyetur nga kryetarja e komisionit, Mimi Kodheli, për mundësinë e sjelljes së eshtrave të Sami Frashërit në Shqipëri, Robo tha se do ta vendosë në axhendën e prioriteteve të tij, pavarësisht se e quajti mision të vështirë, por jo të pamundur.
Kastriot Robo është një diplomat karriere prej më shumë se 30 vitesh. Ai ka shërbyer si ambasador në Greqi, në Mbretërinë e Bashkuar, në Spanjë e në Danimarkë.
Kritikat për rastin Alvin
Largimi i Gazhelit nga posti i ambasaddorit vjen pas kritikave për rastin e Alvin Berishës, djaloshit shqiptar i cili u shpëtua nga kampi Al-Hol në Siri, disa ditë më parë.
“Jam i zhgënjyer, ambasadori shqiptar na dha fjalën që do të zgjidhte gjithçka. Duke qenë se Alvini nuk ka letra italiane, shteti ynë nuk bën dot asgjë për të. Është në duart e qeverisë shqiptare që Alvini që ka mbetur i plagosur nga bombardimet në Siri, të kthehet në Itali pranë të atit që e ka kërkuar dëshpërimisht prej vitesh”-tha gazetari italian Luigi Pelazza i Le Iene.
Emisioni investigativ italian “Le Iene” kritikoi ambasadorin, duke e akuzuar publikisht se nuk i ishte përgjigjur telefonatave të tyre pavarësisht se kishte premtuar ndihmë.
Qëndrimet e ambasadorit shkaktuan indinjatë në rrjetet sociale, me qytetarë që kërkuan largimin e tij.
