Socialistët zhvilluan dje votimet për zgjedhjen e delegatëve, që votojnë në Kongresin e PS-së, për drejtuesit e rinj, përfshi edhe kryetarin.
Por duket se procesi është shoqëruar me parregullsi, përsfhi edhe manipulime, veçanërisht në Shkodër, atje ku përçarja mes socialistëve vijon të thellohet.
Së fundmi, anëtari i këshillit bashkiak Shkodër, përfaqësues i PS-së, Elson Çeliku, me anë të një postimi në rrjet tregon lojën e papëlqyeshme në përzgjedhjen e delegatëve.
“Kam pritur me kureshtje procesin e zgjedhjeve për delegatët e kongresit të PS Shkodër jo vetëm për faktin se partia po kalon një fortunë që nuk kishte ndodhur ndonjëherë por edhe për të parë se deri ku shkon lukunia e atyre që historia do ti skarcojë si persona që nuk sollën asgjë edhe pse “u munduan aq shumë”.
Që nga momenti i parë kur nisi procesi për kandidaturat për zgjedhjet për delegatët filloi një lloj loje e papëlqyeshme në përzgjedhjen e emrave që do të kandidonin.
Në fakt u tha se këta kandidatura do të jenë më të përzgjedhurit por në fakt për disa prej emrave kjo nuk rezultoi e vërtetë.
Deri në çastin e fundit askush nuk e dinte se kush do të ishin kandidaturat duke mos respektuar bazën. Disa emra të tjerë që duhej të ishin pjesë e listës së kandidaturave u përjashtuan duke e zbehur që në fillim këtë proces, por edhe duke treguar qartazi se nuk është gjë tjetër veçse një proces votimi fals dhe i paracaktuar pothuajse me dërgimin e delegatëve përmes metodave antidemokratike”, shprehet Çeliku në postimin e tij.
Më herët janë publikuar dokumente, nga nga Shkodra, ku fitues si delegatë janë shpallur emra që nuk ishin në listën e kandidatëve.
