Do zbatohet Kushtetuta. Ky pritet të jetë reagimi zyrtar i Gjykatës Kushtetuese lidhur me situatën e krijuar, ku Arta Vorpsi e shpallur si anëtare nga KED dhe Rilindja përmes një procedure, si e para në listën e kandidatëve, por që nuk është betuar para Presidentit, sikundër përcaktohet në Kushtetutë, ka deklaruar se është anëtarja e re e Kushetueses.
Vorpsi zgjodhi të betohej para një noteri, duke kryer një veprim të paprecedentë dhe që nuk bazohet në ligje apo Kushtetutë, ndërkohë që 3 anëtaret e reja të Gjykatës Kushtetuese, Marsida Xhaferllari, Fjona Papajorgji dhe Elsa Toska, në prani edhe të dy anëtarëve të mëparshëm të kësaj Gjykate, Vitore Tusha dhe Besnik Mucci, u betuan para Presidentit të Republikës.
Xhaferllari dhe Vorpsi shkuan sot në Gjykatën Kushtetuese, nga ku raportohet se e dekretuara nga Presidenti ka marrë zyrën dhe është konsideruar nga administrata e gjykatës si anëtarja e re. Ndërkohë raportohet se Vorpsi ndodhet në zyrën e saj, atë të Këshilltares Ligjore.
Sekretari i Përgjithshëm i Gjykatës Kushtetuese, Eugen Papandili ka deklaruar paraprakisht se do të dilet me një deklaratë për mediat lidhur me procedurën administrative për këtë çështje.
“Do dalim me një deklaratë për shtyp lidhur me procedurën administrative për këtë çështje. Unë si sekretar i Përgjithshëm do zbatoj Kushtetutën dhe ligjin”, tha Papandili.
