Ardian Dvorani, kryetar i KED-së, ka reaguar përmes një deklarate ndaj Presidentit Ilir Meta lidhur me vendet në Gjykatën Kushtetuese.
Një ditë më parë, Presidenti Ilir Meta dekretoi Marsida Xhaferllarin si anëtaren e re të Gjykatës Kushtetuese, duke u shprehur se ajo plotëson kushtet e kandidimit dhe ka reflektuar aftësi vendim-marrëse. Gjithashtu në argumentet e tij, Presidenti thekson se Xhaferllari ka integritet të lartë moral dhe etik.
Por duket se dekreti i Metës, nuk njihet nga KED.
Dvorani në një reagim shprehet se anëtare e Gjykatës Kushtetuese është Arta Vorpsi, e cila sipas renditjes së KED, ishte e para në listën e kandidatëve që iu dërgua Presidentit për plotësimin e vakancës.
Duke bërë një interpretim të neneve Kushtetuese, Dvorani në reagimin e tij ndaj Presidentit thekson se Arta Vorpsi, konsiderohet e emëruar si gjyqtare e Gjykatës Kushtetuese.
Sipas deklaratës së KED-së, Presidentit i kaluan afatet për përzgjedhjen e një prej emrave të kandidatëve të listuar për vakancën në Kushtetuese, çka do të thotë se automatikisht emri i parë në renditje konsiderohet edhe si anëtari i ri.
Qëndrimi i shprehur nga Dvorani është i njëjtë me atë të artikuluar nga Taulant Balla dhe zyrtarë të tjerë të Rilindjes, në sallën e Parlamentit, ditën kur Kuvendi zgjodhi të plotësojë dy vakancat në Kushtetuese, duke mosrespektuar rradhën, sikundër përcaktohet në Kushtetutë.
Por, ky moment sipas Dvoranit, nuk është i përcaktuar.
Neni 179 pika 2 e Kushtetutës ka për qëllim të përcaktojë institucionin kushtetues që është përgjegjës për plotësimin e një vakance të caktuar. Çdo vakancë lidhet me një emërim, ashtu si çdo vakancë ka një mandat unik i cili i përket një momenti dhe nje organi të caktuar emërimi. Kjo dispozitë parashikon radhën për vakancën që duhet të plotesojë Presidenti, vakancën që duhet të plotësojë Kuvendi dhe vakancën që duhet të plotësojë Gjykata e Lartë.
Qëndrimi i KED për mosnjohjen e dekretit të Presidentit për emërimin e Xhaferllarit si anëtaren e re të Kushtetueses, është pothuajse i njëjtë me vendimin që KQZ mbajti në rastin e dekretit të anulimin e zgjedhjeve më 30 qershor, dhe zhvillimin e tyre me 13 tetor.
Anëtarët e Rilindjes në KQZ morën në atë kohë rolin e Gjykatës Kushtetuese, duke mos njohur dekretet e Presidentit dhe vijuan procedurat për zhvillimin e zgjedhjeve.
Sot, me një qëndrim të ngjashëm, kreu i KED nuk njeh dekretin e Kreut të Shtetit, duke vendosur një tjetër precedent lidhur me kompetencat e Presidentit.
Por ajo që bie në sy në deklaratën zyrtare të kreut të KED-së, Ardian Dvorani, është gjuha dhe sulmi që i bën Presidentit të Republikës, që në paragrafët e parë.
“Duke i vlerësuar jo vetëm si të pavërteta thëniet, por edhe si tërësisht të papërshtatshme në aspektin institucional dhe etik, jo vetëm qëndrimin, por edhe sjelljen dhe gjuhën e përdorur nga Presidenti i Republikës, në raport me vendin, dinjitetin dhe prestigjin që i cakton Kushtetuta e Republikës së Shqipërisë…”, thuhet në paragrafin e parë të reagimit të Dvoranit.
