Momentet e fëmijërisë jo të gjithë kemi mundësi t’i risjellim ndërmend me copëza fotografie, pasi para disa vitesh në Shqipëri aparatët fotografik ishin shumë të pakët.
Ditën e sotme, ka qenë gazetarja Beti Njuma e cila na ka njohur më shumë me fëmijërinë e saj me anë të një fotografie.
Në foton e postuar në rrjetin social Facebook, ajo shfaqet mjaft simpatike me dy gishtat lart, e cila ishte e pranishme në një miting të Partisë Demokratike.
Foton ajo e ka shkëputur nga një revistë e huaj.
“Nuk e di ç’revistë e huaj është, as pse e kam grisur faqen dhe s’e kam ruajtur të plotë numrin. Për më tepër as që e mbaj mend kur më ka rënë në dorë. Di që kam shuuuumë vite që e ruaj. Dhe a e dini pse? Sepse ajo goca e vogël aty në ballë të mitingut, me dy gishtat lart dhe në dorën tjetër flamurin jam unë! Dora vetë!”, shkruan Njuma krahas kësaj fotoje.
Më tej gazetarja e njohur thotë se e kishte huq që të shkonte nëpër mitingjet e PD-së, pavarësisht se prindërit nuk e lejonin, informon dritare.net.
“Jam rritur me shtëpinë tek sheshi Avni Rustemi dhe e kisha huq që shkoja nëpër mitingjet e PD-së pavarësisht kundërshtisë së prindërve. Ky është një rast i jashtëzakonshëm që ka mbetur i fiksuar nga nuk e di cili fotograf! Mbase publikimi i fotos më ndihmon të gjej autorin e shkrepjes, emrin e revistës dhe vitin”, e mbyll postimin Njuma.
